كلام طويل شوية بس معلش استحملوني بس لازم أتكلم عن مسلسل لشخصية محبوبة من الجميع وللأسف عرفت عن المسلسل متأخر وبما أني كنت قريت مذكرات الريحاني قبل كدا ومن محبينه فحبيت أشوف المسلسل وياريت ما حصل واكتشفت كمان إن المؤلف مش بس عامل كارثة تاريخية لأ دا زعلان كمان من النقد وطبعا دا لأنه عامل شيء كارثي مقدرش يواجهه.
أولا كدا مشكلتنا في مصر والعالم العربي لما بيعملوا عمل فني عن سيرة ذاتية لشخص بيطلعوه ملاك وشخصية فوق الوصف مش بتغلط ودي أول كارثة، والتانية كانوا بيغيروا الأسامي ليه مش عارف وطبعاً لو سألت الناس مين رفعت الجمال أو أحمد الهوان فلو لقيت ٥ من كل ١٠ أفراد عارفينهم يبقى خير وبركة، طبعاً غير الأحداث اللي بيضيفوها تحت مسمى الدراما مع إن الحياة أكبر دراما، تالت حاجة ودا مهم إن كلامي من حيث مقارنة الأحداث اللي بقت تاريخ ومسجلة من مذكرات الريحاني نفسه ومن حديث بديعة مصابني في التليفزيون المصري مع ليلى رستم ومتوفر على اليوتيوب أو من مذكراتها اللي اتنشرت بقلم نازك باسيلا وكمان حديث بديع خيري مع ليلى رستم، وطبعاً مافيش أحسن من انك تاخد الأحداث من أصحابها مش من كاتب تاني صاغها ازاي مش عارف، وأحب أضيف إن نقدي دا مش فني فمش هاقدر أحكم على التصوير والاخراج اللي قريت نقد المسلسل فيه بس أنا بنقد من ناحية أحداث تاريخية بما إني محب للتاريخ بكل أنواعه.
ونقول يا هادي ونبدأ:-
١-بإن المسلسل بيتكلم عن الصداقة بين الريحاني وعزيز عيد ومحمد عبد القدوس من قبل العمل سوياً ببنك واحد ودا محصلش لأن في مذكرات صاحب الشخصية نفسه قال إنه عرف الأول عن طريق العمل البنكي واترفدوا عشان بيغيبوا كتير ورقاصات بتجيلهم بسبب العمل المسرحي مش بسبب علاقة مع مرات المدير زي ما قالوا بالمسلسل الخيالي والتاني عن طريق العمل في نجع حمادي وجمعهم حب التمثيل والفن، ودا أول عمل للريحاني وهو في سن ١٦ مش انه كان شغال في محل بقالة مش عارف ليه بيضيفوا أحداث يبوظوا الحقيقة.
٢-احداث اخو الريحاني ومراته وابنه والكلام دا قمة ال... الفنية انها تتذكر فغير انها اصلا مش مذكورة بمذكرات الريحاني نفسه يعني مافيش دليل عليها الا ان حتى لو في دليل فمالهاش لازمة تتذكر لانه عيب ولانها لا هاتزود بالقصة ولا هاتنقصها لكنها واضح انها حشو وخلاص ودا طبعا افلاس فكري غير انه جايب اخوه توفيق دا بيكرهه ودا محصلش اصلا ع عكس ما هو معروف ان ابن توفيق نفسه هو اللي كان بيدير املاك الريحاني واتنصب عليه في اراضي بيت الريحاني
٣-طبعا قصة أبوهم والقصر والكلام دا مالوش أساس من الصحة لان الريحاني من مواليد باب الشعرية بكلام مذكراته ولا انه افتقر واتشل ولا حاجة.
٤-الشيخ بحر اللي حببه في التمثيل والالقاء اللي ماجاش ع ذكره خالص في المسلسل.
٥-نيجي بقى لبديعة مصابني اللي عرفها الريحاني من الشام زي ما قال في مذكراتهم هو وهي كمان مش عن طريق عزيز عيد زي ما المسلسل قال أو قابلته في مصر وعزمته ع شاي طبعا غير انه جايب بديعة جاهلة مش عارفة يعني أيه مسرح مع انها بتمثل من صغرها زي ما قالت وشبعت تمثيل والأكتر انها بتتكلم اكتر من لغة والحقيقة بالضبط انها اول ما بدات تمثيل كان مع فؤاد سليم مع جورج ابيض مش عزيز عيد وبعدين رجعت الشام وجابها الريحاني معاه لمصر تمثل معاه بعقد ب ٥٠ جنية بالشهر.
٦-من الحاجات اللي بتتحشر كدا بدون دليل يذكر وهي محل شك هي قتل سيد درويش ع ايد الإنجليز اه هما محتلين كلاب مش ملايكة لكن مافيش دليل عشان تحشي دماغ المشاهد في سيرة ذاتية بحاجة مش مؤكدة كان ممكن تجيب انه مات ويبقى من ضمن التقويلات عن موته بين الاصدقاء انه مات بالمخدرات أو التسميم ع أيد الانجليز المحتلين ويبقى برضو مابعدتش عن الواقع لكن الافتكاسات لازم تدخل ليه مش عارف؟!
٧-كمان اتقال في المسلسل انه حاول يعمل علاقة مع زوجات مديرينه مرتين لكن المذكرات بتقول انها مرة في نجع حمادي ومحصلش فيها محاولة اي علاقة فعلية ولا حصل ضرب نار ولا هروب من جريمة ولا اي كلام من اللي اتقال في المسلسل هو فعلا هرب لما البنت الشغالة اكتشفت انه كان رايح لمرات المدير وافتكرته حرامي وصوتت فهرب وساب الشغل و قالوا انه راح انضم لفرقة الشامي عشان يهرب بالعكس انضملها عشان يترجم ويمثل معاهم عادي لكن لازم التغيير في الأحداث وايه دليله ع كدا الله اعلم؟!
٨-كمان لوسي حبيبته عرفها عن طريق غير اللي اتذكر في المسلسل دا عن طريق المسرح مش بتنصب ع اصحابه اللي اصلا مكنوش لسه أصحابه بس الهبد عندهم اسلوب حياة.
٩-طبعا المسلسل كمان جاب علي يوسف ميعرفش الريحاني وخطيب بنت بيحاول الريحاني يشقطها ودا كله فتي لان الريحاني كتب في المذكرات ان علي صديقه واول شخص ذكره في المذكرات وبينهم مغامرات ومقالب ع البنت دي اللي مش خطيبة حد وربنا اللي هي صالحة قاصين مصرية يهودية مش سورية زي ما اتقال في المسلسل ودي اول ممثلة تقف ع المسرح.
١٠-طبعا غير احداث تانية غيرها انه كسب لوتارية بفلوس كتير وانه استقال من شركة السكر واللي حصل العكس بكلمات صاحب المذكرات انه اترفد من الشركة ومكسب اللوتارية قراية كف مش فلوس كتير زي المسلسل قال وطبعا ما دهاش لوالدته لانها اصلا مش موجودة الفلوس وانما بعد الرفد خد فلوس من الشركة صرفها وبجزء منها دفع لفرقة أبيض بس مش كشريك لكن سلف وطبعا استردهم بعد فترة كدفعات مش نصبوا عليه زي ما اتقال في المسلسل ودي كارثة ان يتم اتهام جورج ابيض بحاجة زي دي وبعدين اشتغل معاهم كممثل مش كشريك زي ما اتقال فعلا وطردوه عشان نجاحه في أول عرض لان جورج غار منه دا غير اتهام عزيز عيد بالفشل المستمر ودا محصلش.
١١-اما صديقه المترجم هو اللي عرض ع الريحاني العمل سويا عند مكتبة المعارف مش العكس زي ما عرضوا في مسلسل الخيال ليه الكذب في الأحداث مش عارف
١٢-موضوع بنت عمته وراحت فين مالوش أساس معروف وكمان ان اخوه الصغير اللي تاه وراح مع الطرق الصوفية مش مؤكد برضو ولا انه كان معاق ذهنياً كل دا مالوش دليل بكلام صاحب المذكرات.
١٣-كمان مافيش تسلسل تاريخي صحيح وكمان نطة الأحداث في المسلسل اللي ماننسهاش من سنة ١٣ ل ١٦ فجأة واحداث مسرح البرينتانا ونطة تانية من الاشتراك مع منيرة المهدية بفرقته هو وعزيز للانفصال عن عزيز عيد رغم وجود احداث اشتراك مع اولاد عكاشة وفترة قبلها فرقة الكوميديا العربية لوحدها وبعدها برضو حتى الانفصال عن عزيز عيد كل دا تم القفز عليه بطريقة غريبة وبعدين يقابل استيفان ويشترك معاه في خيال الظل ولكن طريقة المقابلة اتلعب فيها برضو عن الحقيقة اللي ذكرها نجيب نفسه وعلى فكرة تمثيله كان مش رقص زي ما اتقال لكن تمثيل فعلي بس الناس مكنتش بتتفاعل إلا مع الرقاصات فجتله فكرة كشكش بيه اللي جابوها انها تسمية زملائه له لكن الحقيقة ان محدش اصلا عارف جت منين ولا مذكورة في المذكرات.
١٤-غير طبعا شخصيات مكنتش موجودة او صلتها اتحطت غلط زي بنت صاحب الابيه دي روز في الحقيقة كانت مجرد بنت صديقة لروزاتي صاحب الملهى مش بنته وغيرها من الشخصيات زي ما اتقال ع الكسار نوبي ودا مش حقيقي وزي ان والدته فرحت في المسرح وقالت دا ابني لأ وخلى الناس تهتف تقول (نينه) لكن دا كان حصل في المترو وبعدين راحت تشوفه بالمسرح بعد ما كانت رافضة مهنته كمشخصاتي لدرجة انه قبلها حط قدامها جرائد فيها اسمه لكنها لم تبالي واتقهر بسبب كدا.
١٥-برضو غير في الاحداث واخترع أحداث وطبعا موضوع ان اخوه الصغير اللي تاه مافيش اي تأكيد ع انه عنده اعاقة ذهنية فليه تجيبه كدا دي سيرة ذاتية تاريخية مش مسلسل خيالي يعني ماينفعش تلعب في الأحداث،
وزي ضرب النار عليه كان في قلب المسرح مش براه مش زي ما اتقال بالمسلسل انه انضرب بالنار لأنه ضد الخلافة بس فعلا حصل ان ناس في الازهر هتفوا ضده وقالوا انه عميل للانجليز بيلهي الناس بالكوميديا لكن المسلسل دمج حدثين مختلفين مع بعض في وقت عرض رواية العشرة الطيبة واللي حصل ان ناس هتفت ضده ووقتها واستدعى ناس من الوفد يشوفوا المسرحية ويكتبوا عنها ويطمنوا الناس ويأكدولهم انه مش عميل بالعكس هو ضد الانجليز.
١٦-ونرجع للاحداث في الفترة دي لكشكش اللي كسر الدنيا ومن الابيه دي روز للاجيبسيانا مرروا بالرينسانس وانفراده بادارة المسرح بدل الخواجة كنجس اللي كان بيتدخل في الادارة ونجاح باهر في الفترة دي بس مش لدرجة انه يكسب ٢٠ الف جنية ويجبهم في شوال زي ما جه في المسلسل ويوزع جزء منها ع الممثلين لان دا رقم رهيب وقتها بل اكبر مبلغ تحصل عليه وقتها بالخزنة كان ٤٠٠ جنية وبعدها بقى ٣٠٠٠ في سنة ١٨ ل٢٠ لكن تصميم ع المبالغة غريب والمبلغ دا كسبه بعد سنة من العرض وانضمام سيد وبديع وبعد ما بقى صاحب نصيب ٧٠٪ من ايراد التياترو مش زي المسلسل قال وكان قبل ما يكون الريحاني صاحب نصيب الاسد في التياترو فكدا في تضارب في الاحداث وتسلسلها
١٧-بعدها تعاون مع عزيز عيد بفرقة تانية عرضو ع مسرح دي باري مش الايجيسيانا لحد الانفصال بينهم بعد فترة وراح الشام واتعرف ع بديعة هناك وفي نفس الوقت رفع عليه الخواجة قضية ياخد تعويض وكسب الريحاني القضية مش زي ما اتقال في المسلسل ان بديعة دفعتهم لانه اصلا كان ع معرفة حديثة بها وبداية شغلها معاه في مصر ولا ان زملاءه جمعوا فلوس ولا ان واحدة جابتله مجوهرات بقيمة ٥٠٠٠ لأ وحصل بسببها مشكلة عند جواهرجي حاطت يافطة بالعبري كمان وترجع تاني تبعتله فلوس اتقذه من الافلاس وكل دا محصلش أصلا ولا قصة التياترو اللي جوزها كتبهوله باسمه وحاول يقتله ولو كان حصل كان الريحاني ذكرها لان واضح من مذكراته انه بيذكر كل شيء حتى اللي فيها لعب بديله مع ستات وكدا فمش عارف ليه التزوير في الاحداث ولازم يجيبوا بطل اي عمل سيرة ذاتبة كل الستات بتموت فيه اكن دا هايعليه اوي مع ان دا اصلا شيء مش صح واستخدام سيء لصورة المرأة كمان.
١٨-بعدين رجع في رحلة للشام تاني وبعدين رجع للعمل تاني في مصر لما عزيز عيد ويوسف وهبي كونوا فرقة جديدة ودا سنة ٢٣ وتوالى العمل في مصر بين صعود وهبوط طبعا اتظلم واتبهدل فيها من ناس نجحهم وكسبوا من وراه زي الخواجة والحاج مصطفى اصحاب المسرح اللي وقع معاهم عقد عمل وبعد نهاية العقد حصلت مشكلة فلوس الماتينيه مع صاحب المسرح وخد الهدوم والمناظر
١٩-فقرر يسافر رحلة لامريكا الجنوبية في ٢٤ اللي قلبت من رحلة استجمام مع بديعة وبنتها واتنين اصحابه ذكرهم بالاسم لرحلة عمل مع بعض الهواة هناك ونجاح كبير في العروض المسرحية في رحلة حوالي سنة زي ما قال وبعدين رجع مصر مش زي ما اتقال في المسلسل خناقة بينه وبين بديعة وان جاله متعهد حفلات ياخده للبرازيل واشترط عليه بديعة تكون معاه وجوزوهم غصب عنه لأ وان الناس تتخانق معاه هناك وعايزين بديعة ترقص مش تمثيل الريحاني ولا اخوه كان معاه لأ وإنه فشل كمان هناك وقعد يعيط (احيه يا بو سوسو) يعني خيال فوق السحاب.
٢٠-بعدين عمل فرقة مع امين صدقي وبعد شوية سابته بديعة مع امين صدقي ورجع الريحاني يشتغل مع بديع خيري وبدأ في عمل فرقة وبناء مسرح الريحاني في سنة ٢٦ لكن مع بداية العروض الممثلين خلعوا وراحوا فرقة يوسف وهبي اللي كانوا سابوها وانضموا للريحاني ولكن لانه توجه للدراما بقى عليه ديون كتيرة ومشاكل قضائية من الديانين من اصحابه اصلا راح راجع لشخصية كشكش مع بديع بفرقة جديدة ومنها بعروض بالقاهرة والمدن لحد اسكندرية ونجاح كويس كل دا في سنة ٢٧ لحد ما رجع تاني اتصالح مع بديعة في ٢٨ لحد ما انفصلوا تاني وكانت فب الوقت دا عملت تياترو من شغلها مش زي ما اتقال في المسلسل انها استغلت احد الوجهاء يعملها تياترو ويفلس كمان واتنكرتله بالعكس العلاقة بينها وبين الريحاني كانت في صعود وهبوط مش انها تكرهه ويتقال عنها انها بتعرض لحم رخيص لان معروف تياترو بديعة خرج فنانين كتير زي اسماعيل يس وغيره ولما انفصلت عن الفرقة جاب كيكي بدلها لحد رجعوها تاني وكمل شغل وسداد لديونه.
٢١-بعدين رحلة للشام ورجع في عام ٣١ وبدأ عمله بالسينما بفيلم (صاحب السعادة كشكش بيه).
٢٢-بعدين اعانات الدولة بدأت في ذلك العام للفرق المسرحية فرقته كانت منهم ولكن النجاح كان بسيط وبعدين رحلة لبلاد المغرب بنجاح متوسط وبعدين رجوع لمصر وبعدين سنة ٣٣ يعمل فيلم (ياقوت) في باريس وعودة لمصر تاني ويكمل مسرح وسينما زي افلام لكشكش بيه باسم (بسلامته عايز يتجوز) ورجع الريحاني لاوج نجاحه بعد نجاح ضعيف كذا سنة ومسرح وسينما والدنيا ولعت معاه خاصة المسرح اكتر ورجع للسينما بفيلم (سلامة في خير) سنة ٣٧ وتوالت نجاحاته في السينما والمسرح وعاد للغنى حتى انتهت رحلته مع الفن دون اكتمال كما لم يتم فيلمه الاخير (غزل البنات) سنة ٤٩
٢٣-في كمان لخبطة وسرعة في الاحداث مش مترتبة خاصة في الحلقات الاخيرة وانتقال غريب بينهم وتسلسل الاحداث والأفلام يعني كان بدل الاسهاب في فترة في البداية اللي مش موجودة اصلا في الحقيقة كنت خلي التفاصيل للنهاية المعروفة.
٢٤-دا غير شخصيات اتواجدت في وقت واحد ودا كله محصلش ومذكرات الريحاني تأكد الكلام دا.
٢٥-طبعا في اخطاء سياسية بسيطة وهي ان ماكنش في ملك في الفترة بتاع الحرب وما بعدها عشان يصدر عنه قرارات وتحديدا وقت تعاون سيد درويش مع الريحاني لان اصلا سيد مات في ٢٣ فمن سنة ١٤ ل١٧ كان السلطان حسين كامل ومن ١٧ ل٢٢ السلطان فؤاد ومن ٢٢ ل٣٦ ملك وطبعا معنى كدا ان مصر مابقتش تحت الخلافة العثمانية لان مصر استقلت منها سنة ١٤ مع بداية الحرب العالمية الأولى وانضمام العثمانين لحلف المانيا ضد بريطانيا المحتلية مصر وخلت حسين كامل سلطان بدل الخديو عباس حلمي الثاني اللي خلعوه الإنجليز بسبب انه كان مع السلطان العثماني ضدهم في الحرب.
٢٦-كمان لما قالوا يوسف بيه وهبي اصلا وقت اتكلموا كان في بداية العشرينات وماكنش لسه اخد البهوية لان اللي ادهاله الملك فاروق اللي اتولى الحكم سنة ٣٦.
٢٧-من الناحية الفنية مش هاقدر استفيض فيها لاني مش ناقد فني لكن كمشاهد اقدر اقول إن الاخراج قديم اوي واختيار الممثلين سيء وكمان تقمس عمرو عبد الجليل اللي بحبه كان بيمثل شخصيته مش الريحاني أبداً غير فرق السن اللي ما اتعلجش بربع جنية مكياج غير كارثة انه يقول (مرسح) يعني واحد خريج فرير وبيتكلم فرنسي وبيترجم وفي الشعر واللغة ممتاز يقول مرسح يعني عملتوها ازاي دي؟!
طبعا غير اختيار ممثلين سنهم اكبر من الشخصيات مع عدم محاولة العلاج بالمكياج او اي شيء والممثلين مش بيحاولوا يتقمسوا لا بيحاولوا يقلدوا كلمات الشخصيات دي في افلامهم زي تقليد مشهد فيلم من الريحاني وتقليد ستيفان بكلمة (في صحة المفاجآت).
فبصراحة شيء بحزن إن مؤلف بيقول راجع ومخرج المفروض كبير بيخربوا سيرة ذاتية لشخصية كبيرة زي الريحاني ويألفوا أحداث ليه مش عارف تغير تاريخ الشخصية؟!
لا ومش عارف ليه جايب حكمت فهمي وسيرة انور السادات وغيره ووقع في غلطة تاريخية كبيرة ان بديعة بتجرجر حكمت وسلمتها للانجليز وبديعة تبقى عميلة للانجليز وتعملهم اللي عايزينه كمان (افتكاسة رهيبة) وبتقولها شغالة مع الالمان بعد ما خسر في ستالينغراد والمعركة دي كانت في سنة ٤٢ وقبلها بمشهد كان لسه الريحاني بيعرض مسرحية حسن ومرقص وكوهين ودي كانت سنة ٤١ فكدا تضارب تواريخ ونطة لابو حلموس فجأة في سنة ٤٧ وانه بدا يتعب وتجيله الست الخيالية اللي مش موجودة أصلاً وتفضل معاه لأ ولما يموت تبقى هاتموت نفسها عليه ورغم كل الفتي دا حتى الجنازة محاولش يجبوها رغم انها متصورة بأمر الملك فاروق وكان جنازة مهيبة وكانت لوسي جت مصر وهي اللي كانت جنبه لاخر لخظة في المستشفى زي ما قالت بنته جينا مش واحدة تانية خيالية وعلى فكرة بديعة كانت بجنازته ولسها صورة مشهورة جنب التابوت بتاعه مش هربانة من مصر فمش عارف ليه حشو الاحداث اللي مالهاش علاقة بالقصة زي مشاكل بديعة مع ابن اختها وانها طمعانة في ثروة الريحاني وبتنسبله بنت او قصة حكمت فهمي وكمان مات بجرعة زيادة من الدواء حيث أعطته جرعة زائدة من عقار الأكرومايسين ليموت بعدها بِثوانٍ في المستفى اليوناني مش راح المسرح والكلام الخيالي دا ولا بيملو المسلسل وخلاص، دا عن نجيب مش حد تاني المسلسل وعلى فكرة طه حسين لما قال السريتارية ع مسرحية كانت حكم قراقوش مش حسن ومرق وكوهين بس الفتي اسلوب حياة عندهم.
ليست هناك تعليقات:
إرسال تعليق
شكراً لتعليقكم